Orotariko zerbitzuak dituzte pertsonen bizitzako arlo ezberdinetan esku hartu ahal izateko: harrera eta orientazio programa, banakako nahiz taldeko arreta psikologikoa, senideentzako formakuntza tailerrak, komunitatean autonomiaz moldatzeko laguntza programa, berdinen arteko laguntza, gazteen arreta eta komunitatean integratzeko programa, besteak beste. Horiez gain, eguneko zentroak eta babes etxebizitzak kudeatzen dituzte.
Baliabide horien xedea, hain zuzen, pertsonen errekuperazioa eta bizi-kalitatea sustatzea da, eta eskarmentu edo esperientzia handia du Agifesek ibilbide horretan, urte guztiotan ehunka pertsonari beren bizi proiektua gauzatzen lagundu baitie.
Zein kasutan jo Agifesera?
Osasun mentaleko arazo anitz artatzen dira Agifesen, larritasun maila desberdinekin, batik bat, eskizofrenia, nortasunaren nahasmenduak, nahasmendu bipolarra, depresioa eta patologia duala, hots, pertsonak buru osasuneko gaitza izatez gain, menpekotasunen bat izatea.
Elkartetik azaldu dutenez, jabetzen dira lehen pausoa ematea ez dela erraza jendearentzat; baina, aldi berean, hori egitearen garrantzia ere nabarmendu dute. Zalantzarik izanez gero, Agifeseko ateak beti zabalik daudela ere jakinarazi dute.
Horretarako dute, hain justu, harrera eta orientazio programa, beharra sentitzen duten pertsonek euren egoera azaldu eta behar dituzten erantzunak eta babesa lortzeko.
- Helbidea. Morlans pasealekua 3, behea (Donostia)
- Telefono zenbakia. 943 47 43 37
- E-posta. agifes@agifes.orgd
- Webgunea. Agifes.org/eu/
- Facebook. Agifes
- Instagram. @agifes.elkartea