Tolosaldeak gertu izan du lehen bandera

Josu Artutxa Dorronsoro 2024ko uzt. 6a, 18:27
Deskargatu Info Ahotsak :

Bigarren luze bikaina egin du eskualdeko traineruak Donostian jokatutako VIII. Fabrika Banderan, ziabogan bederatzi segundo galdu ondoren; 500 metroren faltan hiru segundora gerturatu da. Hala ere, ez da nahikoa izan Arraun Lagunak Euskotren Ligako liderrari aurre hartzeko, eta azkenean, zazpi segundora helmugaratu da. Olatuekin ere gehiago asmatu dute donostiarrek.

Tolosaldeak oso gertu izan du Euskotren Ligako lehen bandera. Hirugarren jardunaldiko estropada jokatu dute, gaur, Donostian: VIII. Fabrika Bandera. Etengabeko mugimendua izan da itsasoan. Haize handia zebilen eta metro eta erdi eta bi metro arteko olatuei aurre egin behar izan die arraunlariek.

Kaleen zozketak ere zeresana eman du. Inork ez zuen lehen kaletik arraun egin nahi, eta hain justu, bigarren txandan, gerora garaile izan den ligako liderra aritu da kale horretatik. Bigarren kaletik Donostiarra aritu da, hirugarrenetik Tolosaldea, eta laugarrenetik Orio. Kontuak kontu eta zozketak zozketa, aurretik atera dira kanpoaldeko kaleetatik aritu diren bi ontziak. Irteera bikaina egin dute biek, eta lehen bi minutuetan, alde handia lortu dute; bost segundo Tolosaldeari, eta hamar Donostiarrari. Hala ere, Oriok ezin izan dio etxeko taldearen erritmoari eutsi, eta Tolosaldearen parean jarri da; eskualdeko ontzia, baina, aurretik heldu da estropada erdialdera. Ziabogara alde nabarmenarekin heldu da Arraun Lagunak. 6.59ko denbora egin du, eta 9, 13 eta 25 segundo atera dizkie Tolosaldeari, Oriori eta Donostiarrari, hurrenez hurren.

Baina ziabogatik atera ondoren, aldea nabarmen jan dio Tolosaldeak Arraun Lagunaki; hiru segundora ere gerturatu dira 500 metroren faltan. Hala ere, olatuen dantzan gehiago asmatu du etxeko traineruak. Tolosaldea bultzatzen zuen olatu berak bultzazen zuen gero ontzi donostiarra. Azkenean, bigarren postuarekin konformatu behar izan du eskualdeko ontziak. Hiru jardunaldietan, hiru garaipen Arraun Lagunakentzat. Bihar Zierbenan jokatuko dute ligako laugarren jardunaldia.

VIII. Fabrika Bandera:

  1. Arraun Lagunak: 12.53,38
  2. Tolosaldea: 13.00,96
  3. Orio: 13.04,22
  4. Donostiarra: 13.23,74
  5. Cabo: 13.35,06
  6. Hondarribia: 13.43,90
  7. Tiran: 14.23.82
  8. Hibaika: 14.55,54

Euskotren Liga:

  1. Arraun Lagunak: 24 puntu.
  2. Tolosaldea: 20 puntu.
  3. Orio: 19 puntu.
  4. Donostiarra: 15 puntu.
  5. Hondarribia: 10 puntu.
  6. Cabo: 9 puntu.
  7. Hibaika: 7 puntu.
  8. Tiran: 4 puntu.
kirola

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!