Gipuzkoako sega txapelketak daude jokoan, gizonezkoen mailan. Zizurkilen igandean jokatu zen Azkartasuneko Txapelketa, eta datorren igandean, hilaren 23an, Amasa-Villabonako Arratzain baserriaren zelaietan jokatuko da Sega Sail Txapelketa.
Azkartasuneko Txapelketan Julen Gabirondo izan zen txapelduna. Gabirondok 5.56ko denbora behar izan zuen lanak amaitzeko. Ondoren sailkatu zen Mikel Lizartza tolosarra, 6.06 eginez, hau da, hamar segundo eskasera. Jon Otegi ere igo zen podiumera, 6.55ko denborarekin. Oier Urkola anoetarra sailkatu zen laugarren postuan 7.22 eginez, Jokin Etxeberria amasarra bosgarren 7.58rekin, eta Iban Pardo izan zen seigarrena 9.56ko denbora markatuz.
Horietako lau segalari izango dira berriro aurkari igande honetako lehian. Jokin Etxeberria, Julen Gabirondo, Mikel Lizartza eta Iban Pardo ariko dira nor baino nor Sega Sail Txapelketan. Azkar eta txukun moztu beharko dute segalariek 1.000 metro karratuko saila. Segalaria mozten doan heinean, epaileak txukundu beharrekoa markatzen dio eta azkarren bukatzen duenak irabazten du. Amasa-Villabonako Arratzain baserrian izango da jokoan txapelketa hori, 12:00etan hasita.
Argazkiak: Gorka Emazabel/Gipuzkoako Herri Kirol Federazioa