Juan Kruz Igerabide, Galtzaundiren ekaineko Tertulia Literarioan

Ataria 2024ko eka. 11a, 07:58

Idazle adunarrak 'Ura Saltoka' bere eleberriaren inguruan hitz egingo du. Ekainaren 18an izango da saioa, 19:00etan, Tolosako Gazte Topagunean –kultur etxeko lehen solairuan–, eta Yurre Ugartek dinamizatuko du.

Galtzaundiren Tertulia Literarioaren hurrengo saioa ekainaren 18an, asteartea, izango da Tolosan. Oraingo honetan, Juan Kruz Igerabide idazle adunarra izango da gonbidatua eta Ura Saltoka bere eleberriaren inguruan hitz egingo du. Tertulia literarioa 19:00etan hasiko da Tolosako Gazte Topagunean –kultur etxeko lehen solairuan–, eta Yurre Ugarte izango da saioaren dinamizatzailea.

Juan Kruz Igerabidek badu –liburu honetan esaten digun bezala, betidanik izan du– naturarekiko joera bat, jaidura bat, aldi berean izan dena jolasleku, bizigarri, egunerokorako ikasgai. Haur garaiko oroitzapenetatik hasita –«Hantxe gaude aita, ama eta hirurok iturritik edaten, nik lauzpabost urte besterik ez»–, azkenaldion hunkitzen duen aktualitate gordineraino –«Hortxe gaude gizakiok zuhaitz taxonomikoaren bazter batean, guztien buru garela usterik»–, nolabaiteko autobiografia sentimental bat, nolabaiteko kontakizun generazional bat, nolabaiteko historia natural bat osatu du Igerabidek, ohi duen gisan pasarte mamitsu, gogoeta hedatzaile, prosa ezin gozoagoz betea. Ovidio garaikide batek egingo lukeen modura, burmuina besteari irekia beti, galdu gabe sekula izpiritu kritikoa, jakinik jarrera hori dela gizakiaren eta naturaren arteko harremanak hobeki ulertzeko modu bakarra.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!