Tolomendi Tolosaldeko Landa Garapen Elkarteak datozen hilabeteetan Tolosaldeko Landa Komunitateen Garapenerako Programaren inguruko lanketa burutu behar du, datozen urteetarako eskualdeko ardatz estrategikoak definitzeko helburuarekin. Programaren inguruko lanketari ekin aurretik, bi girotze saio antolatu dituzte, ondorengo galderari buruz gogoeta egiteko: Landa eremuan, hiriaren garapen ereduaren kopia bat sustatu behar dugu edota landa eremuaren berezko balioetan oinarritutako garapen eredu propio bat?
Lehen saioa hurrengo ostegunean, hilaren 13an, izango da, Berastegiko udaletxean, 19:00etan. Bertan, elikadura-burujabetza eta lehen sektorearen etorkizuneko erronkez ariko dira Aritz Ganboa Nafarroako Sakanako bailaratik eta Iparraldeko Euskal Herriko Laborantza Ganbarako Iker Elosegi.
Bigarren saioa Amasako Kultur Etxean izango da, ekainaren 28an, ostirala, 11:00etan. Landa komunitateak, zaintza eta jarduera ekonomiko berriak hizketa-gai hartuta ariko dira Jaime Izquierdo asturiarra eta Raul Pilar Garces, Olloko Gure Sustraiak Kooperatibako kidea.
Bi girotze saio horien ostean, udazkenean Tolosaldeko Landa Komunitateen Garapenerako Programa egiteko lanari ekingo zaio eskualdeko norbanako, elkarte eta udaletxeekin elkarlanean.