Eduardo Chillida Matematika Olinpiaden 20. edizioan laugarren saritua izan da Orixe institutuko DBH 2ko Damian Munteanu ikaslea. Matematika Olinpiada bi fasetan garatu da. Lehenengoa martxoaren 14an burutu zen, edizio honetan parte hartu duten 79 ikastetxeetako bakoitzean. Orotara 1.800 ikasle inguru izan ziren parte hartzen. Proba horren emaitzetatik, finalera pasatzeko, ikastetxe bakoitzeko bi edo hiru ikasle hautatu zituzten irakasleek, ikastetxearen tamainaren arabera.
Azken fasea edo finala maiatzaren 11n izan zen hiru hiriburuetan eta 170 ikasle inguruk parte hartu zuten. Azken fase horretan puntuaziorik onenak lortu dituzten 12 ikasleek jaso dituzte sariak, ikasketak egiten ari diren ikastetxeetako arduradunak eta senideak lagun zituztela egin zen ekitaldian.
Lehenengo lau sarituek, diploma egiaztagiriarekin batera, uda honetan Ingalaterran ingeles maila hobetzeko bi asteko ikastaro bat egiteko beka jaso dute.