Renfek adierazi duenez, astelehenetik aurrera Irun-Brinkola aldirietako trenek ordutegi aldaketa izango dute. Izan ere, Lezo-Irun eta Hernani-Donostia zatietan Abiadura Handiko Trenari dagokion lanen ondorioz errail bakarretik igaroko da trena. Horren ondorioz, tren gutxiago izango dira, eta bidaia denbora handituko da.
Hala, adibidez, orain arte astegunetan Tolosa eta Donostia artean 41 tren bazeuden aukeran, astelehenetik aurrera 24 izango dira, eta puntu batetik besterako iraupena 7 minutu handiagokoa izango da, batez beste.
Renfetik esan dute eskaintza murrizteak ekarriko duen eskaerari aurre egiteko, Irun eta Brinkola arteko zenbait tren konposizio bikoitzean ibiliko direla. Gainera, aldiriko bidaiariek Distantzia Ertaineko trenak erabili ahal izango dituztela gogoratu dute. Distantzia Luzeko eta Ertaineko trenek ez dute maiztasun kopurua aldatuko bi noranzkoetan, baina bidaia denbora 8-10 minutu luzatuko dute batez beste.
Renfek ordutegia begiratzeko gomendatu die erabiltzaileei, bai Renferen webgunean, mugikorraren aplikazioan, estazioetako paneletan edota 943 84 12 51 zenbakira deituta.