Ezkurdiaren aurka zuen atzo partida Eibarko Astelena pilotalekuan, eta 22-10 irabazi zuen alegiarrak. Ezkurdia ez zen fin aritu partida osoan zehar eta Artola ondo moldatu zen batez ere bigarren zatian. Lehen atsedenaldira 12-7 irabaziz iritsi zen alegiarra, eta markagailua 13-10 ere joan zen. Hortik aurrera Artolarentzat izan ziren tanto guztiak eta 22raino iritsi zen. Alegiarrak 16 tanto egin zituen, horietatik bost sakez, eta 4 pilota galdu zituen. Bere aldetik, Ezkurdiak 6 tanto egin zituen eta 6 galdu.
Garaipenarekin A multzoko lehen postuan jarri da Artola. Hurrengo partida Elordiren aurka izango du, horrek 22-20 irabazi baitzion Zabalari. Artola eta Elordiren arteko partida ostiral gauean jokatuko da Azkoitiko Gurea pilotalekuan. Bihar egingo dute pilota aukeraketa.
Jokin Altuna amezketarra da final-laurdenetan dagoen eskualdeko beste pilotaria. B multzoan dago sartuta, eta asteburu honetan jokatuko du bere lehen partida. Aurkaria Unai Laso izango da, eta neurketa igandean izango dute, Bilboko Bizkaia frontoian. Bihar egingo dute pilota aukeraketa. B multzoko lehen jardunaldiko partida bat jokatu da asteburuan, Dario eta Zabaletaren artekoa. 22-17 irabazi zion Dariok Zabaletari, eta sailkapeneko buru jarri da.
