Maria Lasa irurarrak, Lilatoia irabazi berritan, beste garaipen bat poltsikoratu du. Kasu honetan, pasa den igandean Euskal Herriko Unibertsitateak antolatutako XX. Udaberriko Lasterketa irabazi du. Bera izan zen azkarrena 10 kilometroko proban 36.35eko denbora eginda. Naroa Sagarna ormaiztegiarra izan zen bigarren (38.16), eta Olatz Zabala irundarra hirugarren (38.23). Itziar Ibarbia alkizarra podiumeko postuetatik gertu ibili zen, baina laugarren helmugaratu zen (40.10). Eskualdeko beste korrikalari bat sailkatu zen lehen hamarren artean. Maider Etxeberria billabonatarra bederatzigarren izan zen (41.34). Gizonezkoetan, eskualdeko korrikalaririk ez zen helmugaratu lehen hamar postuetan.
Lasak ez ezik, eskualdeko korrikalari gehiagok ere jaso zuten saria. Izan ere, Ibarbia azkarrena izan zen 45 urtetik gorakoetan, eta Lourdes Colomo zizurkildarrak 55 urtetik gorakoetan lortu zuen garaipena. Bestetik, gizonezkoen 65 urtetik gorakoetan, Expedito Gomez ibartarra izan zen azkarrena.