EHNE eta Enba sindikatuek eta Gipuzkoako Baso Elkarteak (GEBE) deituta Gipuzkoako baserritarrek mobilizazioa egingo dute ostiralean. Donostian, Batzar Nagusietan, elkarretaratzea egingo dute 12:00etan eta manifestu bat irakurriko dute mobilizazioarekin bukatzeko. Zehazki, antolatzaileen ordezkaritza bat Batzar Nagusietako lehendakariarekin eta talde politiko guztiekin elkartuko da prestatu duten manifestua aurkezteko. Donostiara iristeko hiru zutabetan antolatu dira. Baserritar batzuk Legorreta, Tolosa eta Andoaindik joango dira; Orio eta Urbil merkatalgunetik beste batzuk; eta Errenteria eta Garbera merkatalgunetik beste batzuk. Tolosaldeko kasuan Tolosako Arzabaltza industrialdetik aterako dira 09:00etan.
Lehen sektoreari lotutako 40 bat eragilek babestu dute mobilizazioa eta euren asmoa da Gipuzkoako gizarte osoari lehen sektoreak lurralde osorako eta gipuzkoar guztientzat egiten duen ekarpena nabarmentzea.