Eusko Jaurlaritzak kutxazain automatikoak instalatzeko laguntza lerro bat onartu du. Horretarako, datorren martxoan lizitazio bat irekiko du udalerri bakoitzean zerbitzu horren diru laguntza esleitzeko. Gipuzkoan 22 udalerri lagunduko dituzte diruz eta horietako 8 eskualdean daude; Aduna, Alkiza, Altzo, Berrobi, Bidania-Goiatz, Ikaztegieta, Irura eta Zizurkil.
Pedro Azpiazu Ekonomia eta Ogasuneko sailburuak ekimen hau aurreratu zien finantza erakundeei iaz, biztanleriaren bizi baldintzak hobetzeko. «Helburua da benetako finantza-inklusio baten alde lan egitea, landa eremuen garapen ekonomikoan laguntzeko. Izan ere, bankuetako zerbitzuak ematen dituzten erakundeen presentziak aurrezkia, familien inbertsioa eta enpresa-proiektuen garapena sustatzen du, eta horrek, aldi berean, eremu osoaren aurrerapen ekonomikoari laguntzen dio», nabarmendu du Finantza eta Aurrekontuetako sailburuorde Hernando Lacallek, gaur Arabako Navaridas herrian egindako ekitaldian.