Tolosako Udalak azaroa amaieran ekin zion Amarotz eta Txarama auzoen arteko bidegorrian argiteria publikoa jartzeko lanei, inguru horretako ikusgarritasuna eta segurtasuna hobetzeko. Lanak zortzi asteko epean egitea aurreikusten zuten eta jada amaitu dituzte; dagoeneko, beraz, martxan da eremu horretako argiztapena. «Mugikortasun jasangarria sustatzeko, eremu horretako ikusgarritasuna eta segurtasuna hobetzea izan da lanen helburua», adierazi dute udaletik.
Bestalde, Anoetara bidean dagoen bidegorriaren zati batean argiteria hondatu dela jakinarazi du udalak. «Eremu hori Gipuzkoako Foru Aldundiaren eskumenekoa da, eta dagoeneko abisua pasa diogu, konponketa egiteko eskaera luzatzearekin batera».