Reala Zuzenean ekimenaren babespean maketa lehiaketa antolatu dute. Bertako talentua bultzatzeko asmoz sortu dute ekimena Garbera merkataritza gunearekin lankidetzan. Meliora Aiztondo bailarako taldeak Galdutako hura kantuarekin parte hartu du lehiaketan eta emanaldia eskainiko du Garberan, apirilaren 20an.
Barne epaimahai batek azken fasean parte hartu dute hamabi taldeak aukeratu ditu eta aste honetan jakinarazi ditu zeintzuk diren hautatutakoak. Parte hartzaileen abestiak Keler Espazioaren webgune ofizialean eta Garberarenean entzun daitezke. Gune horietan kantua entzun eta gogokoenaren alde egin ahal izango du bisitariak. Apirilaren 22an itxiko da bozketa txanda eta finalerdietan parte hartuko duten lau taldeak zeintzuk diren jakinaraziko da. Lehenengo finalerdia maiatzaren 5ean egingo da Keler espazioan eta bigarrena Garberan, maiatzaren 11n. Saio bakoitzean irabazle bat aukeratuko da finalerako eta horretarako ez dituzte aurreko txandako botoak zenbatuko.
Maiatzaren 18an ospatuko da finala Garberan eta handik aterako da talde irabazlea. Saridunak AME estudioan bi abesti grabatu ahal izango ditu eta Reale Arenan jokatuko den La Ligako azken partidaren atsedenaldian emanaldia eskainiko du. Hamabi talde finalisten artean, bi sari zozkatuko dira: Realaren lehen taldearen kamiseta bat eta Reale Arenan jokatuko den partida baterako bi VIP sarrera.
Eskualdeko taldea hautatuen artean
Hamabi finalisten artean sartu da Meliora taldea. Rock, hard-rock eta heavy metala jotzen duen Aiztondo bailarako taldea da. Beraien musikak 80. hamarkadako heavyaren eta rock modernoaren eragina du. Duela urte bete, beraien lehenengo albuma aurkeztu zuten Aethereus izenekoa. Euskaraz eta ingelesez idatzitako abestiak osatzen dute diskoa.
Apirilaren 20an joko du taldeak Garberan, Reala Zuzenean maketa lehiaketaren barruan.