Binakako Pilota Txapelketaren zortzigarren jardunaldia jokatu berri da asteburuan, bigarren itzuliaren lehen jardunaldia hain justu, eta Erik Jaka lizartzarra eta Mariezkurrena II.a sendo daude sailkapeneko lehen postuan, zazpigarren garaipena lortu ondoren. Laso eta Arangurenen aurka 22-19 irabazi dute, Amorebieta-Etxanoko Pilota Pro Festan. Jakak eta bere atzelariak 14 tanto egin dituzte eta 11 galdu, eta aurkariek 8 tanto egin dituzte eta 5 galdu.
Eskualdeko bi pilotarik elkarren aurka jokatu dute jardunaldi horretan, eta Iñaki Artola alegiarra irabazle atera da Jon Ander Peña tolosarraren aurkako neurketan. Artola-Imaz bikoak 22-15 gainditu dituzte Peña II-Albisu Etxebarrin jokatutako partida gogor batean. Artola-Imazek 9 tanto egin dituzte eta 7 galdu, eta Peña II-Albisuk 8 tanto egin dituzte eta 13 galdu. Artola-Imaz bosgarren postuan daude lau garaipenekin, eta Peña II-Albisu seigarren jarri dira orain, hiru garaipenekin.
Bere aldetik, Jokin Altuna amezketarrak eta Martija bere atzelariak laugarren garaipena lortu dute, azken lau partidak jarraian irabaziz. Hain justu, lehen lau partidak galdu egin zituzten, baina hasierako hiruretan ez zuen jokatu amezketarrak lesio batengatik. 22-18 gainditu dituzte Elordi-Rezusta Eibarko Astelenan. Elordi-Rezustak 13 tanto egin dituzte eta 8 galdu, eta Altuna III-Martijak 14 tanto egin dituzte eta 5 galdu.
Xabier Tolosa anoetarrak eta Ezkurdia bere aurrelariak partida galdu dute P. Etxeberria eta Zabaleta bikoaren aurka, 15-22, Tolosako Beotibar pilotalekuan. Ezkurdia-Tolosak 11 tanto egin dituzte eta 6 galdu, eta P. Etxeberria-Zabaletak 16 tanto egin dituzte eta 4 galdu. Azken lau partidak galdu dituzte Ezkurdia-Tolosa bikoak eta une honetan sailkapeneko azken postuan daude, guztira bi garaipen eskuratuta.
Serie B Txapelketa
Promozio mailako txapelketan, Martxel Iztueta tolosarrak lehen postuan jarraitzen du. Asteburuan, ordea, ez du jokatu eta Iker Elizegi asteasuarra izan da bere ordezkaria. Agirre-Elizegi bikoak 22-11 irabazi diote Senar-Morgaetxebarriari.
Gorka Ugartemendia alkizarrak eta bere aurrelari Zubizarreta III.ak ezin izan dute bere partida irabazi, 22-15 galduz Larrazabal-Eskiroz bikoaren aurka. Zubizarreta III.a eta Ugartemendia seigarren postuan daude.