Judo Klub Tolosako Unai Saralegik eta Unai Regillagak larunbatean Caceresen (Espainia) jokatutako Nage No Katako IX. Iberiar Txapelketa irabazi zuten. 434,5 puntu lortu zituzten, eta bigarren geratu zirenak 411 puntura iritsi ziren.
Saralegi gaixo egon zen, eta Munduko Txapelketaren ondoren ezin izan zituzten entrenamendu asko egin. «Datorren urterako sailkapenerako lehen proba izaten da, eta puntuak jokoan izaten direnez, bertara joatea erabaki genuen», esan du Saralegik. «Gure betiko aurkariek, Extremadurako bikoteak, ez zuten parte hartu, bati ebakuntza egin ziotelako. Beraiek ez zeudenez, bidea nahiko zabalik genuen garaipena lortzeko».
Saioan nabaritu zuten aurretik izandako entrenamendu falta. «Nik nabaritu nuen eta kostatu zitzaidan saioa bukatzea», esan du Saralegik. «Baina bideoa ikusi genuen, eta ez zen asko nabaritu. Nahiko aldea atera genien bigarrenari eta hirugarrenari eta Munduko Txapelketako arantzatxo hori kendu dugu».
Judo Klub Tolosako beste bikotea, Joseba Regillagak eta Joseba Etxarrik osatutakoa, ez zen txapelketan izan. Etxarri orkatila minduta itzuli zen Munduko Txapelketatik. «Iberiar Txapelketaren aurreko astelehenean proba egin zuten, eta erabaki genuen hobe zela ez joatea, minarekin baitzegoen».