Orain arte promozio mailako txapelketa deitu zaionari izena aldatu diote eta Binakako Serie B Txapelketa jarri. Eskualdeko bi pilotari izango dira bertan, biak Baiko enpresakoak eta atzelariak: Martxel Iztueta tolosarra, bere bigarren parte hartzean, eta Gorka Ugartemendia alkizarra, bere lehenengoan. Iztuetaren aurrelaria Agirre izango da, eta Ugartemendiarena Zubizarreta III.a. Baikoren beste bi bikoteak Alberdi II-Morgaetxebarria eta Larrazabal-Eskiroz izango dira. ASPE Pelotak aukeratu dituenak hauek izan dira: Egiguren V-Eskuza, Salaberria-Arbizu, Exposito-Gaskue, eta De la Fuente-Bikuña.
Ostiral honetan, Azkoitian emango diote hasiera lehiaketari Egiguren V-Eskuzak eta De la Fuente-Bikuñak. Larunbatean, Agirre-Iztuetak eta Alberdi II-Morgaetxebarriak jokatuko dute elkarren aurka Aizarnazabalen. Igandean Zubizarreta III.a eta Ugartemendia, eta Senar, Larrazabal ordezkatuz, eta Eskiroz izango dira aurrez aurre Seguran. Eta azaroaren 30ean, Eibarren, Salaberria-Arbizu eta Exposito-Gaskue saiatuko dira aurreneko puntua eskuratzen.
Martxora bitartean luzatuko da Eskuz Binakako Serie B Txapelketa. Zazpi jardunaldiko bi itzuli, orotara hamalau jardunaldi jokatuko dituzte pilotariek sailkapen ligan. Bi bikote onenak zuzenean sailkatuko dira finalerdietako ligara eta hirugarren eta seigarren postuen artean sailkatuek playoffak jokatu beharko dituzte aurrera egin ahal izateko. Finalerdietako ligak hiru jardunaldi izango ditu eta final handia Labriten izango da martxoaren 23an.