'Gure Plaza Txo - Nerabeak eta Gazteak Udal Txikietan' proiektuko helburua 1.000 biztanletik beherako Gipuzkoako 9 udalerritan nerabeen sustapena indartu eta iraunkor egiteko planteamendu bat garatzea da. Aisialdia lanerako erreminta bihurturik, nerabeen beharrei erantzunez, komunitatearekiko loturak sortu eta indartzea da proiektu honetan parte hartuko duten gizarte hezitzaileen xedea.
Gipuzkoako 10 herritan garatuko dute proiektua eta horietako bederatzi eskualdean daude. Elduain eta Lizartzan gauzatzeaz gain, Albiztur, Alkiza, Altzo, Berrobi, Bidania-Goiatz, Ikaztegieta eta Larraul daude zerrenda horretan. Eskualdetik kanpoko hamargarren herria Aizarnazabal da.
Proiektuaren nondik norakoak azaltzeko aurkezpena egingo dute bihar 18:00etan, udaletxeko pleno aretoan. Bertan, zalantzak argitzeaz gain, aurreko ikasturteko balorazio txiki bat ere egingo dutela jakinarazi dute bi udaletatik.