Udazkenean sartzearekin batera, eta udako torneoak amaitzen doazen honetan, pilotariak Lau eta Erdiko Txapelketarako prestatzen ari dira. Aurten, urriaren 6ean hasiko da, eta finala azaroan jokatuko dute.
Baiko Pilota enpresak dagoeneko baieztatu du txapelketan zein sei pilotarik parte hartuko duten, eta horien artean daude Iñaki Artola alegiarra, Jon Ander Peña tolosarra eta Erik Jaka lizartzarra. Urrutikoetxea eta Larrazabal ere txapelketan ariko dira, eta azken pilotaria Agirrek eta Zubizarreta III.ak jokatuko duten aurre-kanporaketan erabakiko da. Partida hori irailaren 30ean, larunbata, jokatuko dute Itziarko (Deba) Zabalsoro pilotalekuan.
Egun berean izango da Aspeko bi pilotariren arteko aurre-kanporaketa, eskualdean. Elezkano II.ak eta Dariok Tolosako Beotibar pilotalekuan jokatuko dute ; 17:15ean hasiko da jaialdia eta bigarren partida izango da. Lehen partidan, Salaberriak eta Erostarbek, Expositoren eta Tolosaren aurka jokatuko dute. Bi jaialdietako sarrerak dagoeneko salgai daude Entradasfronton.com webgunean. Beotibarkoen kasuan, merkeenek 10 euro balio dute eta garestienek 25 euro.
Eibarko enpresak oraingoz ez du txapelketan parte hartuko duten pilotarien zerrenda argitaratu, baina ezusteko erraldoirik ezean, Jokin Altuna amezketarra, iazko txapeldunordea (22-21 galdu zuen finala Ezkurdiaren aurka), zerrenda horretan egongo da.