Iñaki Diazek amaiera bikaina eman dio denboraldiari. Lehendakari Txapelketa irabazi du, 23 urtez azpikoen mailan. Asteburuan, Oñatin jokatu zen lasterketan laugarren izan zen txirrindulari tolosarra. Denboraldi honetan, erregulartasun handia izan du: bigarren izan da Leintz-Gatzagan eta Urdulizen, hirugarren Murgian, laugarren Zegaman eta bosgarren Elgoibarren eta Gernikan. Horrez gain, Madrilgo eta Kantabriako Itzulietan lehiatu zen.
Larunbatean Oñatin jokatutako lasterketan, eskualdeko txirrindulari gehiago izan ziren: Laboral Kutxa Team taldeko Iñaki Murua altzotarra eta Unai Zubeldia ibartarra seigarren eta hamabigarren izan ziren, hurrenez hurren, eta Baque Team taldeko Unax Iztueta baliarraindarra hogeigarren helmugaratu zen.
Lehendakari Txapelketako taldekako sailkapen nagusian, Laboral Kutxa Team taldea izan da onena.