Munduko txirrindularirik onenak 12:30ak inguruan iritsiko dira larunbatean eskualdera. Bidania-Goiaztik barrena jaitsiko dira Tolosara. Ondoren, Anoetatik Alkizara joango dira, 13:00ak inguruan. Bertatik Asteasura jaitsiko dira, eta Zizurkil eta Aduna zeharkatuz, agur esango diote Tolosaldeari.
Tolosako Udalak azaldu duenez, egun horretan trafiko etenak egongo dira. Rondilla kalea itxita egongo da trafikoarentzat 12:00etatik 14:00ak arte. Udaltzaingoak ibilbide guztian kotxeak ez aparkatzeko eskaera luzatu du. Bestalde, hiribusak ondorengo geldiuneak egingo ditu: Zumarditxikia, Kondeaneko Aldapa, Iurre biribilgunea, Iurreamendi, Kiroldegia, Usabal industrialdea, Amarotz, San Blas, Bizkai kalea, Kondeaneko Aldapa, Asuntzion Klinika eta Zumarditxikia berriro ere.
Tolosa-Donostia bidea egiten duten autobusek, Arriaran biribilgunean geralekua egin ondoren, autobidetik eta suhiltzaileen biribilgunetik barrena zezen plazara iritsiko dira eta hauek izango dira geralekuak: zezen plaza, Nafarroa etorbidea, Jon Andoni Irazusta (biala) eta Larramendiko 6 zenbaki parean.
Tolosaldea zerbitzuko autobusek ere geltokiak aldatuko dituzte: Rondillako geltokia Santa Klarara lekualdatuko da eta San Frantzisko ibiltokiko zein Araba etorbideko eta Bentaundiko geltokiak kendu egingo dira.