Iragan ostiralean 33 urteko langile tolosar bat hil zen Gasteizen, makina batek harrapatuta. Istripua 12:00ak aldera gertatu zen Gasteizko Betoñuko industrialdeko enpresa batean. Larrialdi zerbitzuak lantegira bertaratu ziren, baina istripua jazotako lekuan hil zen langile tolosarra.
LAB sindikatutik zehaztu dutenez, Bost enpresako langilea zen, eta Gasteizko Talleres Aratz lantegian lanean ari zela gertatu zen istripua. Sindikatutik esan dutenez, aurten dagoeneko 32 pertsona hil dira lan istripuz. Bada, egoera salatzeko asteazkenean bi mobilizazio egingo dituzte. Batetik, LABek deituta, 12:00etan Asteasun kokatutako Bost enpresaren atarian elkartuko dira. Bestetik, herritar talde batek deituta, Tolosako Trianguloa plazan egingo dute elkarretaratzea, 19:00etan.