Santa Marina eguna asteartean izango da baina Albizturko izen bereko auzoan, gaur ospatu dute eguna. Arratsaldeko 18:00etan, urteroko ohitura bihurtzen ari den herri kirol jaialdia ikusteko aukera izan dute bertaratutakoek, Albizturko eta Bidaniako gazteak elkarren aurka. Urdinez jantzi da talde bisitaria eta horiz etxekoak, eta hainbat proba egin behar izan dituzte: trontza, kixkia -sagarrak biltzea-, ingudea, lokotxak, txingak eta korrika. Gainera, jaialdia amaitzeko, taldekide guztien artean 20 buelta egin behar izan dituzte lasterka. Adostutako proba guztiak txukun eta lehenengo amaitu dituztenez, Albizturko gazteak izan dira nagusi. Egunaren amaiera Alaitz eta Garaxi herriko trikitilariek eman diote.