Donostiako Kontxako Badian jokatu da Euskotren Ligako bigarren jardunaldia, VII. Fabrika Bandera. Etxeko taldeak, Donostiarrak, lortu du garaipena, bigarren luze bikaina burutu ondoren. Tolosaldea ez da lehengo astean Galizian bezain ondo aritu, eta laugarren izan da azkenean. Denboran kontuan izanez gero, lehen hiru sailkatuengandik urruti izan da gaurkoan.
Donostiarrak atzekoz aurrerako estropada egin du. Lehen bi minutuetan bi segundoko aldea ateratzen zion orduan aurretik zihoan Arraun Lagunakek; Tolosaldeak ordurako 5 segundoko galera zuen. Ziabogara oso parekatuta heldu dira etxeko bi ontziak, baina Arraun Lagunakek 2 segundoko aldea atera dio Donostiarrari, 4 segundokoa Oriori eta 11 segundokoa Tolosaldeari. Bigarren luzean, bestelakoa izan da estropada. Donostiarra aurretik jarri da segituan, eta aldea handitzen hasi da gainerako traineruekiko. Amaieran, garaipena ez ezik, errekor berria ezarri dute etxeko estropadan. Lehia oso estua eta polita izan da bigarren postuarekiko, Arraun Lagunak eta Orioren artean. Amaieran, Arraun Lagunak hobeto aritu da eta bigarren postuan amaitu du.
Tolosaldeak, bere aldetik, lehen txandan ontzi onena izan den Hondarribiaren denborari erreparatuz aritu da arraunean, laugarren posturako lehian. Azkenean, 20 ehuneneko aldea besterik ez da izan, eskualdeko arraunlarien alde. Hain justu, Hondarribiak aise irabazi du lehen txandan, Hibaikaren, Caboren eta Tiranen aurretik.
Donostiako estropadako sailkapena:
- Donostiarra: 10.44,90
- Arraun Lagunak: 10.48,98
- Orio: 10.54,10
- Tolosaldea: 11.12,66
- Hondarribia: 11.12,86
- Hibaika: 11.25,96
- Cabo: 11.30,80
- Tiran: 11.50,24
Euskotren Ligako sailkapena:
- Arraun Lagunak: 15 puntu
- Donostiarra: 14 puntu
- Tolosaldea: 12 puntu
- Orio: 11 puntu
- Hondarribia: 8 puntu
- Hibaika: 5 puntu
- Cabo: 5 puntu
- Tiran: 2 puntu