Pasa den larunbatean, Trail Sallent de Gallego mendi lasterketaren bigarren edizioa jokatu zen, Aragoiko herrian. Bi proba izan ziren: luzea (27 kilometro) eta motza (14 kilometro). Proba luzean, emakumezkoetan, Sarah Ugarte Alpino Uzturre taldeko korrikalaria izan zen txapeldun. Tolosan bizi den korrikalari donostiarrak 3.36.33ko denbora egin zuen. Eskualdeko beste korrikalari bat sailkatu zen bigarren postuan: Soronea-Ammma taldeko Laiane Arrospide tolosarra. Arrospidek Ugartek baino 10 minutu eta 10 segundo gehiago behar izan zituen ibilbidea osatzeko: 3.46.43. CM Ibonciecho taldeko Cristina Ara izan zen hirugarren, Arrospiderengandik 3 minutura: 3.49.43.
Proba motzean, gizonezkoen kategorian, eskualdeko beste korrikalari bat izan zen podiumean. Iker Eceiza ibartarra bigarren izan zen, 1.11.07ko denbora eginda, Carlos Cabrera irabazlearengandik (1.09.48) minutu pasatxora helmugaratuz. Gorka Simon izan zen hirugarren, 1.12.14ko denborarekin.