Hitzordu nagusia uztailaren 21etik 23ra ospatuko den Kultura Plazara Jaialdia izango da. Joan den urtean egin bezala, Zumarditxikiak bost kontzertu hartuko ditu asteburu osoan zehar, baina ez hori bakarrik: gastronomia eta artisautza ere uztartuko dira.
Musika estiloari dagokionez, aniztasuna izango da nagusi kontzertuetan, eta Ibil Bedi, Broken Brothers Brass Band, Nhil, David Colomo edota Olaia Intziarteren emanaldiak izango dira aukeran. Ibil Bedik emango dio hasiera jaialdiari hilaren 21ean eta Olaia Intziarte izango da jaialdiko azken egunean. Horrez gain, DJek girotuko dituzte kontzertu aurreko eta ondorengoko tarteak, tartean DJ Alai egongo delarik emankizun bikoitzarekin.
Asteburu osoan zehar, gainera, jan-edanerako bi postu izango dira Ama Jatetxearen eta Cárnicas Goyaren eskutik. Gazte artisauen azoka ere izango da alboan. Hamar bat postu izango dira: bitxigileak, kamiseta egileak, margogileak eta abar.
Emanaldi gehiago uztailetik irailera
Kultura Plazara jaialdiaz gain, kultur eskaintza uda osora eta leku gehiagotara zabaltzeko ikuskizunen zikloa ere izango da, Kultura Plazara: beste plazak izenpean. Eskaintza hori, gainera, herriguneko plaza gehiagotara ez ezik, landa-eremuko Bedaio, Aldaba eta Urkizu auzoetara ere iritsiko da. Emanaldi horiek, hain zuzen, bertako bizilagunekin elkarlanean adostu eta antolatu dira, beren eskaerak aintzat hartuta.
Larunbat honetan izango da lehen hitzordua, Bedaion: Mirua talde tolosarrak emango dio hasiera egitarauari, 19:00etan. Aurretik Mirian Mendoza ipuin kontalariaren saioa izango da. Tolosako Musika Bandak dantzarako aproposak diren kantuekin urtero eskaini ohi duen emanaldia ere izango da Lopez Mendizabal plazan, hilaren 21ean.
Irailaren amaierara bitarte luzatuko da kontzertu eta dantza ikuskizunen eskaintza: Ibarrako Alurr eta Amasa-Villabonako Oinkari dantza taldeak, Alize Mendizabal organo jolea, Urbil Artola eta Jon Gurrutxaga, Mikel Artieda & Zazpiketers, edota Sonakay flamenko-taldea.
Autobus zerbitzu berezia
Hain zuzen, landa-eremuko emanaldietarako joan-etorria errazteko, autobus zerbitzu berezia eskainiko du udalak. Larunbatean Bedaion egingo den saiorako 18:00etan aterako da autobusa, San Frantzisko elizaren pareko geltokitik. Irailaren 2an, Aldabara joateko 17:00tetan abiatuko da, eta irailaren 23an Urkizurako, berriz, 18:00etan. Itzulera emanaldiak bukatu ondoren izango da, eta irteerako leku berean egingo du geldialdia.
Autobus zerbitzua doakoa izango den arren, beharrezkoa izango da lekuaren erreserba egitea. Horretarako, kultura@tolosa.eus helbidera idatzi beharko da, eskatutako eserleku kopurua zehaztuz. Izena emateko epea, kontzertua baino bi egun lehenago amaituko da.
Kultura Plazara 2023 egitaraua:
MIRUA - Uztailak 8 - 18:30 - Bedaio
Maitane Iruiñek eta Malentxo eta Martin Zeberio anai arrebek osatzen dute Mirua taldea. 2019an martxa hartuta, pop-a eta elektronika uztartzen dituzte gipuzkoarrek. 2021ean Gaztea maketa lehiaketa irabazi ondoren, soinu berritzailea Euskal Herrira ekarri, eta hyperpop euskalduna posible dela erakutsi dute.
TOLOSAKO MUSIKA BANDA - Uztailak 21 - 20:00 - Lopez Mendizabal
Enrike Arostegiren zuzendaritzapean, Tolosako Musika Bandak hainbat emanalditan hartzen du parte urte osoan zehar. Udalerriko erakunde zaharrenetako bat izateaz gain, Euskal Herriko bandarik zaharrenetakoa ere bada. Dantzarako kantuez osatutako kontzertua eskainiko dute.
IBIL BEDI - Uztailak 21 - 22:00 - Zumarditxikia
2018. urtean sortutako talde nafarra da. Ahotsarekin batera, gitarra, baxua, biolina, saxofoia, bateria, eta teklatua nahasten ditu talde honek. 2019ko ekainean lehen diskoa kaleratuta, beste bi lan egin dituzte orain arte, bata 2021ean, eta azkena, 2023an. Pop-a haien estilo nagusia bada ere, hortik haratago doaz beren abestietako bakoitzean.
BROKEN BROTHERS BRASS BAND - Uztailak 22 - 12:00 - Zumarditxikia
2006an jaioa, New Orleanseko Brass Bands garaikideen kale-soinuan eta jai-giroan oinarritzen da Nafarroako taldea. Funk, Gospel eta Jazz modernoaz baliatuta, inprobisazio kolektiboa da Broken Brothers-en ezaugarri nagusia. Energiaz betetako interpretazioei esker, jai, jaialdi, kale zein agertoki ugarietako protagonistak bihurtu dira.
NHIL - Uztailak 22 - 22:00 - Zumarditxikia
Debagoiena eskualdeko pop-funk musika-taldea da Nhil, Aretxabaletan sortu zena 2017 amaieran. Guztira bi disko kaleratu dituzte beren ibilbidean zehar: lehena, "Aztarnak" , 2020an, eta bigarrena, berriz, "Bizi bagina bezala" , 2022ko ekainean. Hurrengo sei musikariek osatzen dute taldea: Sara Alonso abeslari eta piano-jotzaileak, Beñat Arrieta gitarra-jotzaileak, Asel Errasti bateria-jotzaileak, eta Xabi Zuazabeitia baxu- jotzaileak, Lia Garai saxofoi- jotzaileak eta Aitor Ruiz de Austri tronboi jotzaileak.
ENTRE MANANTIALES, David Clomo "Pajarillo" - Uztailak 23 - 20:00 - Zumarditxikia
Tolosako gitarrista, moldatzailea eta konpositorea, ekoizlea, musika zuzendaria eta zenbait konpainien sortzailea da Colomo."Entre Manantiales" ikuskizuna hurbil eta kutun honetan, oholtza edo antzoki ezberdinetan izan dituen esperientziak kontatuko dizkigu gitarra flamenkoaren, eta besteak beste, perkusioaren eta txalapartaren laguntzarekin.
OLAIA INZIARTE - Uztailak 23 - 22:00 - Zumarditxikia
1999an jaiotako artista nafar gaztea da Olaia Inziarte. 2022an argitaratu zuen Inziartek bere lehen diskoa bakarlari gisa: "Lehengo Lepotikan Burua" . Bertan, Nafarroako herri kantutegiari egiten diote erreferentzia konposizioek, pop ilun estiloa antzeman daitekeelarik. Iker Lauroba, Joseba Tapia eta Chica Sobresalto musikariekin lan egiteaz gain, Pleura taldeko ahotsa ere izan da.
ALIZE MENDIZABAL - CAPILLA DE MÚSICA SANTA MARÍA DEL CORO- Abuztuak 11 - 20:00 - Tolosa
Alize Mnedizabal organista donostiarra Baionan eta Toulous-en trebatu zen, besteak beste, Michel Bouvard, Jan.Williem Janssen eta Louis Robillard irakasleekin. Bere ibilbidean zehar, kontzertuak eman ditu Europan, Hego Amerikan eta Japonian. 2009tik geroztik, Donostiako Koruko Santa Maria basilikako Cavaillé-Coll organoaren organista titularra da.
ALLUR - LUBERRI IKUSKIZUNA - Irailak 2 - 17:30 - Aldaba
Elkartasunean dago talde baten indarra eta ahalmena. Haien gazte izaera eta desadostasuna aldarrikatzen, mundua jarriko dute dantzan. "Elkartzeko, nahasteko, ospatzeko eta ezagutzeko. Nahiz eta noizbehinka hanka sartu, bidean ikasteko. Umorearekin, ametsekin, minarekin eta saminarekin. Baina beti irrifartsu eta festarako egarritsu."
HIKA TEATROA ETA OINKARI DANTZA TALDEA - GAZTE IKUSKIZUNA - Irailak 9 - 18:30 - Plaza Berria
HIKA Teatroaren ekoizpena da, Oinkari Dantza Taldearekin elkarlanean sortutakoa. "Gazte" kaleko ikuskizuna da, gazteek sortutakoa, eta publiko guztiari zuzendua. Euskal Dantza Tradizionaletik abiatuta, dantza garaikidearen eta bestelako dantza modernoen munduraino zabaltzen da ikuskizuna, ahotsari eta testuari lekua emateaz gain. Musikaren aldetik, elektronikaren eskutik dator berrikuntza, batez ere, hip hop-aren kulturan oinarrituta.
SONAKAY - Irailak 23 - 18:30 - Urkizu
2015ean Donostian sortutako flamenko-taldea da Sonakay. Taldea osatzen duten 12 kideek eskarmentu handia dute musikan, eta besteak beste horrexengatik, ijitoen eta euskaldunen arteko musika-kulturaren fusioan aditutzat hartzen dira donostiarrak.