Larunbatean, 51 urteko gizonezko batek 47 urteko emakume bat (bere bikotekidea) hil zuen Iruñeko Ermitagaña auzoko Anayak tabernan, 09:00 aldera. Arma zuri batekin egindako zauriak zituen. Iruñeko Udaltzaingoak atxilotu egin zuen, hiltzailea zelakoan. Hain zuzen, gizonezkoa bera joan zen Iruñeko Udaltzaingoaren komisariara, 10:00 aldera, eta aitortu zuen berak hil zuela emakumea. Azaldu zuenez, eztabaida bat izan zuten, eta gero hil zuen. Atxilotuak bere burua entregatu zuen. Udaltzainak eta Espainiako Polizia establezimendura iritsi zirenean, emakumearen hilotza topatu zuten bertan. Bikote izateaz gainera, Anayak tabernan bazkide ziren, eta elkarrekin bizi ziren. Emakumeak hiru ume zituen, eta haien testigantza jasota ondorioztatu dute hilketa matxista izan dela.
Gertatutakoa gaitzetsi eta hilketa matxista eta emakumeen aurkako edozein indarkeria arbuiatu dituzte Iruñeko Udalak eta Nafarroako Gobernuak. Gaur arratsalderako elkarretaratzeak deitu dituzte Euskal Herriko mugimendu feministek, tartean, eskualdeko zenbaitek. Tolosaren kasuan, bi elkarretaratze izango dira. Batetik, Tolosako Asanblada Feministak deituta, 19:00etan, Trianguloa plazan; Tolosako Udalak bat egin du deialdiarekin. Bestetik, Tolosaldeko Itaiak deituta, 20:00etan, toki berean.
Amasa-Villabona eta Zizurkil batzen dituen oinezkoen zubian ere elkarretaratzea egingo dute, kasu honetan, Aiztondoko mugimendu feministak eta Lurgatz talde feministak deituta. 18:30tan izango da mobilizazioa. Amasa-Villabonako eta Zizurkilgo udalek bat egin dute deialdiarekin.