Asuncion Klinikako langileek lan baldintzak hobetzeko hasitako greba egun eta mobilizazioekin jarraitzen dute. Salatu dute zuzendaritzak ez duela negoziatzeko borondaterik eta negoziaketa mahaia blokeatuta dagoela. Greba egunetarako ezarritako gutxieneko zerbitzuak gehiegizkoak direla gaineratu dute eta adibide bezala esan dute pasa den asteburuan ospitaleko solairu batean greba egunetarako zehaztutakoa baino erizain gutxiago zeudela; horrez gain, prentsa bidez izan dute ospitale berrirako Plan Funtzionalaren berri.
Egun osoko hurrengo greba eguna asteazkenean, hilak 17, izango dute eta maiatzaren 18, 19, 22, 23, 29, 30 eta 31n ere egingo dituzte lanuzteak. Era berean, asteazkenean 11:00etan elkarretaratzea egingo dute Tolosako udaletxearen aurrean, 12:00etan Asuncion aurrean elkartuko dira eta 17:00etan kotxe karabana egingo dute Usabal industriagunetik irtenda.