Baserritarren eguna izango da astelehenean, maiatzaren 15ean, eta horren harira, ekitaldiak antolatu dituzte hainbat herritan.
Tolosan, esaterako, larunbateroko azoka baliatuko dute baserritarrak gogoan izateko. 10:30ean, Udaberriko dantzariek lagunduta, eskertza ekitaldia egingo diete udal ordezkariek Berdura Plazako eta Zerkausiko baserritarrei.
Igandean, berriz, Berrobin, hamaiketakoa egingo dute Iriarten, eta 18:00etan Elbira dokumentala emango dute, Etxolan. Gaztelun, 11:30ean, Sega Eskolako kideek erakustaldia egingo dute. Alkizan, 14:00etan bazkaria izango dute, eta 18:00etan, fronteniseko finalak izango dira.
Gainerako herrietan astelehenean bertan izango dituzte ospakizunak. Amasan, esaterako, 10:30ean meza nagusia izango dute, 12:30ean bertsolari eta trikitilariak, 14:00etan bazkaria Uxo Toki elkartean, eta 20:30ean afaria elkartean bertan.
Asteasun, 11:00etan meza izango da, San Pedro elizan, eta ondoren, herriko umeen eskutik kirol erakustaldia, plazan. Ondoren, barrikotea egingo dute, trikitilarien laguntzarekin. 14:00etan, bazkaria izango da, Sarasola sagardotegian, eta bazkalostean, Maialen Lujanbio eta Jexux Mari Irazu bertsolarien eta trikitilarien saioa izango da.
Berastegin, bestalde, 11:45ean prozesioa izango da udaletxetik San Martin elizara, txistulariez lagunduta. 12:00etan meza, herriko haur dantzari eta bertsolariek lagunduta, eta ondoren, trikitilariak izango dira.