II. Domusa Teknik 40MLK lasterketako parte hartzaileek 65 kilometroko ibilbidea burutu behar izan dute, 3.700 metroko desnibel positiboarekin. Ultra modalitateko Euskal Herriko Kopako proba Azpeitiko plazan hasi da 8:00etan, eta leku berean amaitu da. Korrikalariek ondorengo mendiak igo eta jaitsi behar izan dituzte: Arroita edo Arauntza (612m), Sañoa (616m), Gazume (1.002m), Hernio (1.078m), Murumendi (868m), Izaspi (973m), Hiruarrieta edo Samiño (933m) eta Xoxote (912m). Bidania-Goiazko tartea Herniotik behera jaistean hasi dute, Iturburutik (Trintxera) Armoi aldera hartu eta hortik Murumendi aldera igarota. Azken honetan, gainera, iaz egindako balorazio galdetegian jasotako erantzunak ikusita, ibilbidearen zati batzuk moldatu dituzte, distantziak eta desnibela mantenduta.
Bigarren aldi honetan ere Bidania-Goiazko Udala babeslea izan da eta herriko hainbat enpresak lagundu dute. Horrez gain, Bidania-Goiazko hainbat herritar ere boluntario lanetan ibili dira, batez ere, herria zeharkatzen zuten guneetan.
Lopetegi, bigarren gizonezkoetan
6.21.16ko denbora eginda, Goar Lopetegi ibartarrak bigarren amaitu du lasterketa. Borja Zubizarreta azkoitiarra izan da garailea; Lopetegi baino 27 minutu eta 43 segundo lehenago helmugaratu da. Hemen ikusi daitezke gaurko lasterketako emaitzak.
Goar Lopetegiren denborak eta sailkapenak:
- Gazume (11km) -> 1.09.45 (5)
- Iturburu (19km) -> 1.45.02 (5)
- Murumendi (29 km) -> 2.45.02 (5)
- Mandubi (34 km) -> 3.03.23 (5)
- Hiruarrieta (43 km) -> 4.07.48 (5)
- Izarraizko atea (54km) -> 4.58.23 (4)
- Xoxote (60km) -> 5.55.05 (2)
- Helmuga (65km) -> 6.21.16 (2)
Goar Lopetegi da 2023ko Domusa Teknik 40 MLK Mendi Lasterketako azpitxapelduna gizonezkoetan! 👏👏
— Domusa Teknik 40 MLK Mendi Lasterketa (@DomusaT40mlk) May 6, 2023
Goar Lopetegi es el subcampeón de Domusa Teknik 40 MLK Mendi Lasterketa de 2023! 👏👏 pic.twitter.com/QeYtxLjxiw