Manifestazioa 17:00etan aterako da Bulebarretik Osasungintza publikoa indartu. Osakidetza suntsitzearen aurka lelopean, Osasun Publikoaren Aldeko Herri Plataformak deituta. Bilbon eta Gasteizen 12:00etan egingo dituzte manifestazioak.
TOPAk esan du Osakidetzak bizi duen egoera arduradun politikoek egindako plangintza eta kudeaketa «luze eta negargarriaren» emaitza dela. «Osasungintza publikoan erabilitako murrizketa politikak ondorio asko ditu, besteak beste, anbulatorioak itxi, arreta ordutegiak murriztea, telefonoan luzaroan egon behar izatea hitzordua hartzeko, arreta presentziala lortzeko gero eta zailtasun gehiago izatea, espezialista batekin hitzordua lortzeko itxaron zerrenda luzeak egotea...». «Politika horrek egunero larriki eragiten die herritarrei oro har, eta bereziki, sektore ahulenei», gaineratu dute.
Eusko Jaurlaritzaren jarrera «immobilista» salatu du plataformak eta hori dela eta «beste behin mobilizatu beharrean» daudela esan du, horrela «kalitatezko osasungintza publiko duina eta unibertsala bermatu dezan» eskatzeko.