Partida serioa jokatuta, Erik Jaka mendean hartu zuen Joseba Ezkurdiak (22-14) Eibarko Astelena pilotalekuan. Buruz Buruko Txapelketako final laurdenetako ligaxkako lehen puntua poltsikoratu zuen arbizuarrak.
Partidari hobeto ekin zion Jakak (1-4), baina 9-1eko partzial bati esker haizea bere alde jarri zuen Ezkurdiak. 17-14 gerturatu zen Jaka, baina hortik amaierara artekoak erreskadan egin zituen garaileak, fisikoki larri samar ibili arren. Sakez asmatu zuen, errematean ere fin ibili zen, eta, batez ere, pilota gutxiago galdu zituen. Jakaren arabera, une gakoetan egin zituen akatsek kondenatu zuten.
Igandean, Altunaren estreinakoa
Ostiralean jokatu zen B multzoko aurreneko neurketa, Azkoitian, eta Dariok 22-19 irabazi zion Peio Etxeberriari, oso lehia estuan. Etxeberriak eta Jakak, larunbatean jokatuko dute elkarren aurka, Iruñean. Ezkurdiak ostiralean jokatuko du, Gasteizko Ogetan, Darioren aurka.
A multzoan, Elordik 22-19 irabazi zion larunbatean Elezkano II.ari, Iruñeko Labriten. Jokin Altunak eta Unai Lasok igande honetan jokatuko dute multzo horretako beste norgehiagoka, Bilbon.