Tolosaldean okupazio datuek hobera egin dute Aste Santu honetan

Tolosaldea Garatzeneko Turismo Sailak, aurtengo Aste Santuan eskualdean izandako datuak helarazi ditu. «Badirudi bertakoek kanpora bidaiatzeko joera handiagoa izan dutela, baina kanpotik etorritako bisitari gehiago jaso ditugu», adierazi dute.

Turismo sailetik adierazi dutenez, Tolosaldeko landetxeen datuek ere hori erakusten dute. «Ostegunetik astelehenera %80ko okupazioa izan dute aurten eta egun berdinetan, aurreko urtean, %75ekoa izan zuten. Datuak sakon azterturik, ostegunetik iganderako datuak alderatuko bagenitu, zertxobait jaitsi da okupazioa aurreko urtearekin alderatuta (%83, 2023an; eta %86, 2022an), baina Pazko Asteko okupazioak hobera egin du. Oporraldia gehiago luzatu dela dirudi aurtengoan. Beraz, balorazioa positiboa da, okupazio altuko egun gehiago izatea lortu baita».

Jatorriari dagokionez, estatuko bisitari gehienak Herrialde Katalanetako herritarrak izan dira, ohikoa den moduan. «Aurtengoan, berezitasun bat izan da. Bigarren jatorri errepikatuena Valentziako Komunitatea izan da, madrildarren aurretik», nabarmendu dute. Atzerritarren kasuan, frantsesak izan dira gehiengoa, eta ondoren, Erresuma Batuko herritarrak.

Bisita gidatuetan, gora

Tolosaldeko turismo bulegotik Aste Santuko egunetan eskaini diren bisita gidatuetan, jende gehiagok parte hartu du.

Txindokiko Itzala gunera hurbiltzen den profila ezberdina dela adierazi dute turismo sailetik. «Txangozaleak izan ohi dira gehienak, eta horiek zertxobait behera egin dute. Euskadiko gainerako probintzietatik bai hurbildu direla bisitariak Zuhaitz Parkeko informazio puntura, baina estatu eta atzerriko turista gutxiago jaso dituzte».