Lehen finalerdian, Zaldua II.ak eta Arregik, 30-35 galdu zuten Goikoetxea V.a eta Aiestaran VI.aren aurka. Lehen tantoetatik nagusi izan ziren irabazleak, nahiz eta galtzaileek aldeak murriztea lortu. Goikoetxea izan zen partidako pilotari onena, 18 tanto eginda. Aiestaranek ere partida txukuna jokatu zuen, tanto gutxi galduta. Zalduak 12 tanto egin zituen, eta Arregik 15, horietatik 11, sakez.
Bigarren finalerdian, 35-28 galdu zuten Irazuk eta Martiarenak, Gurrutxaga eta Zaldua I.aren aurka. Partida parekatua izan zen, eta uneoro markagailuan gertu izan ziren bi bikoteak. Partida berdintzeko tanto bakarrera egotetik (22-21), ordea, 30-22 galtzera pasa ziren Irazu eta Martiarena. Hor hautsi zen partida. Bi debutari berriak izan ziren partidako onenak; Gurrutxagak 16 tanto egin zituen, Irazuk, berriz, 12 tanto egin zituen, eta bakarra galdu. Atzelariak ere ondo aritu ziren; Zalduak sakez min handia egin zuen eta bederatzi tanto lortu zituen modu horretara. Martiarenak ere zazpi tanto egin zituen sakez.
Larunbat honetan jokatuko dute Berria Erremonte Txapelketako finala Goikoetxea V.a-Aiestaran V.a eta Gurrutxaga-Zaldua I.a bikoteek. 16:30ean hasiko da jaialdia, eta lehen partidan, Berrobin bizi den Aritz Eskudero andoaindar atzelariak Zaldua II.arekin jokatuko du, Irazu eta Apezetxearen aurka. Hirugarren partida Urriza-Azpiroz eta Segurola-Barrenetxea IV.a bikoteen artekoa izango da.