Irene Iturria korrikalari bidaniarra bigarren helmugaratu zen larunbatean, Mendaron jokatutako Kilimon Trail mendi lasterketaren hamaikagarren edizioko proba motzean. Estadillako (Aragoi) Carrodilla Cabestre izan zen azkarrena (1.05.50). Iturriak ia bi minutu gehiago behar izan zituen proba amaitzeko (1.07.44), eta oso gertu izan zuen hirugarren postuan sailkatu zen Jone Oar-Arteta gernikarra (1.07.50). Gizonezkoetan, Urrestillako Ibai Angulo izan zen onena (53.01).
Proba luzea ere jokatu zen Mendaron, 23 kilometroko luzera eta 1.650 metroko desnibel positiboa zuena. Hemen eskualdeko zenbait korrikalari izan ziren. Gizonezkoetan, Alain Santamaria ezkaraitarra izan zen azkarrena (1.56.10), Hassan Ait Chaou billabonatarra zortzigarren izan zen (2.01.21), eta Iñaki Olano altzotarra hamaikagarren (2.02.33). Emakumezkoetan, Malen Osa oñatiarra izan zen onena, 2 ordu eta 16 minutuko denbora eginda, eta eskualdeko bi korrikalari helmugaratu ziren lehen hamarren artean: Oihana Zubillaga anoetarra bosgarren izan zen (2.34.01) eta Leire Elola tolosarra hamargarren (2.41.12).