Gipuzkoako Foru Aldundiko Ekonomia Sustapena, Turismo eta Landa Inguruneko Departamentuak eta Gipuzkoa Merkatariak elkarteak antolatuta, elkartearen 90. urteurreneko jardunaldien baitan, ekitaldia egin zuten asteazkenean, Tolosako Bide Bide jatetxean. Bertan, aitortza egin zieten Lehiakortasuna Hobetzeko Programa arrakastaz gainditu duten Gipuzkoako 17 saltokiri, tartean, eskualdeko hiruri: Tolosako Kimetz-Andia eta Liot, eta Zizurkilgo Garazi loradenda. Originaltasuna, kalitatezko arreta eta benetakotasunagatik saritu zituzten. 17 kide berri horiekin, 253 dira guztira aitortutako Singular Dendak.
90 urte bete dituzten Tolosako saltokiak ere omendu zituzten, beraien ibilbideagatik: Lardies, Eceiza gozotegia, Casa Arregui, Ogi Ona, Altuna harategia, Argizti optika eta Muñagorri harategia. Saritutako merkatariez gain, Iker Estensoro Gipuzkoako Foru Aldundiko Ekonomia Sustatzeko zuzendari nagusia eta omendutako saltokietako udaletako ordezkari batzuk izan ziren ekitaldian.