Añorgan Gipuzkoako Esprint Duatloi Txapelketa egin zen martxoaren 12an, eta bertan Tolosaldeko Triatloi Taldeko hainbat kide izan ziren. Gizonezkoetan, Elur Urkolak absolutu mailan hirugarren postua eskuratu zuen eta junior mailan garaipena. Emakumezkoetan, Aratz Urkolak Gipuzkoako txapelketa eskuratu zuen jubenil mailan eta Alaia Ait Chaou txapeldunorde izan zen maila berean. Axier Tejeria taldekidea ere primeran aritu zen txapelketan.
Bestalde, pasa den asteburuan distantzia motzeko Euskadiko Duatloi Txapelketa egin zen Oñatin. Parte hartzaileek 10 kilometro korrika, 40 kilometro bizikletaz eta amaitzeko beste 5 kilometro korrika egin zituzten. Tolosaldeko Triatloi Taldeko sei partaidek ekin zioten frogari, baina eguraldi kaxkarra, lesioak eta arazo mekanikoak medio, erdiek amaitu zuten soilik. Josu Goenagak sailkapeneko 11. postua eskuratu zuen, Danel Leundak 21.a eta Beñat Azaldegik 28.a. Taldeka sailkapenean podiumetik oso gertu geratu ziren, laugarren postua eskuratuz.