Finalerdietako ligaxka amaitzeko azken jardunaldia geratzen da. Bertan erabakiko da Laso-Imazen aurka nortzuk jokatuko duten finala. Bi bikotek dute horretarako aukera: Altuna III-Tolosak eta Elordi-Zabaletak. Hain justu, bi bikote horiek elkarren aurka jokatuko dute martxoaren 26an, igandean. Finalerako txartela balioko duen partida hori Bilboko Bizkaia pilotalekuan izango da, 17:00etan hasiko den jaialdian.
Jardunaldi erabakigarria
Jon Ander Peñarentzat ligaxkako bigarren jardunaldia erabakigarria izan da, txapelaren lehiari agur esan baitio tolosarrak. Mariezkurrena II.arekin bikotea osatuz, 22-15 galdu zuten atzo Eibarko Astelena pilotalekuan, Jokin Altuna eta Xabier Tolosaren aurka. Gakoa galdutako pilotetan egon zen. Peña II-Mariezkurrenak 15 pilota galdu zituzten, Altuna III-Tolosak, zazpi.
Garaipen horrekin irabazleek txapela euren eskuetan dute. Geratzen zaizkien bi partidak irabaziz gero, amezketarra eta tolosarra izango dira txapeldun. Hurrengo partida Bilbokoa izango dute, finala, aldiz, apirilaren 2an jokatuko da Iruñeko Nafarroa Arenan.