Miren Larrarte bidaniarra eta Arrillaga hirugarren postuan geratu dira ligaxkan, asteburuan 22-16 galdu ondoren Aldai eta Mendizabalen aurka. Hain justu beraien aurka jokatuko dute finalerdia, bigarren geratu baitira. Partida hori Laudion jokatuko da, igande honetan, 12:00etan hasiko den jaialdian.
Elite mailako beste finalerdia Arrizabalaga-Capellan eta Garai-Gaminde bikoek jokatuko dute. Arrizabalaga-Capellan geratu dira lehenengo postuan sailkapenean, eta Asteasuko jardunaldian 8-22 irabazi zieten Aldai eta Mendizabali.
Pilota mistoko lehen mailakoan, Irati Zabala lizartzarrak bere partida irabazi zuen Asteasuko jardunaldian, Etxegarairekin batera 16-22 gailenduz Beitia-Anitua bikoari. Oraindik ez dira lehen mailako ligaxkaren partida guztiak jokatu, eta, beraz, finalerdiak zehaztu gabe daude oraindik.