Landaola, Gipuzkoako landa eremuaren garapenaren alde lan egiten duen elkartea da. Sari emate ekitaldia, ostirala, martxoak 3, 12:00etan ospatuko da, Berastegiko udaletxean, eta lau dira emango diren sariak:
- Erakunde Pribatuaren Landaola Saria.
- Erakunde Publikoaren Landaola Saria.
- Emakumeak Landa Eremuan Landaola Saria.
- Urteetako ibilbideari Landaola Saria.
Erakunde Publikoaren Landaola Sarien hautagaien artean; Amezketako Pello Zabala gunea izango da. Pello Zabala gunea Amezketako ondare kultural eta naturala biltzen duen zentroa da. Azken urteetan, gainbeheran zegoen Ieraregibizkar errotaren eraberritze lanak burutu eta etxebizitza zen aldean, Amezketako ondare naturala eta kulturala ezagutzera emateko zentroa jarri da. Bi solairutan banatuta dago Pello Zabala gunea, lehenengo solairuak kultura eta folklorea ditu ardatz eta bigarrenak natura. Aralar, Arritzagako glaziar harana, Zazpiturri iturburua, Amezketako argizaiolak edo Fernando Amezketarrari buruzko informazio interesgarria aurkitu daiteke bertan. Egun, bisitarientzat harrera gune da eta ikastaldeei, helduen talde antolatuei, familiei eta norbanakoei zuzendutako eskaintza aberatsa du. Errota martxan ikusteko aukera, erakusketak, bisita gidatuak, talo tailerrak, hitzaldiak, ikastaroak, etab. eskaintzen ditu Amezketako ondarea jasotzen duen gune honek.
Erakunde publikoaren sarian, beste izendatuak:
- Hondarribiko Udala
- Zubillaga Hiltegia
- Eibarko Udala
- Zumarragako Udala
- Zarauzko Udala
Sariak emateko garaian, honako alderdiak kontuan hartu dituzte: proiektuak eredugarri izateko dituen baldintzak; proiektuak eragiten dion landa eremuko biztanleria eta sortutako lanpostu kopurua; duen zabaltzeko aukera eta izan duen oihartzuna, edota eskualdeko landa garapen elkartearekin izandako lankidetza.
Urteetako ibilbideari saria eta Emakumeak Landa Eremuan Saria egunean bertan adieraziko dira.