Finalera ez paseatzeagatik «pixka bat penarekin» geratu da Cabang. «Azken hesitik gaizki atera nintzen, eta irteera besteek baino beranduago egin nuen», zehaztu du, baina «pozik» dago esperientzia berri bat bizitu duelako: «Nire lehen nazioarteko lehiaketa izan da eta nahiko kontentu gaude alde horretatik».
Atleta irurarrak onartu du «nahiko urduri» zegoela, baina gozatzeko aukera ere izan zuela. «Beste esperientzia bat bizitu dut eta orain etortzen denari aurre egingo diogu», azaldu du. Hurrengo lehiaketa absolutu mailako Espainiako Txapelketa izango du. «Sentsazio onekin geratu ginen Asiako Txapelketatik, eta orain ea maila hobea emateko gai garen Espainiako Txapelketan».
KLUBEN ARTEKO ESPAINIAKO TXAPELKETA
Asteburuan, kluben arteko Espainiako Txapelketa jokatu zen Ourensen (Galizia). Atletico San Sebastian klubeko Maria Lasa irurarra 1.500 metroetako lasterketan 4. izan zen 4.38.87ko denborarekin. Taldea laugarren izan zen nesketan. Realeko Ander Martinez de Rituerto tolosarra hirugarren izan zen pertika jauzian, 5,30 metro saltatuz. Marka horrekin Gipuzkoako maila absolutuko pista estaliko errekorra berdindu zuen eta 23 urtez azpiko Europako Txapelketarako marka egin zuen. Taldea zazpigarren geratu zen mutiletan.
Ander Martinez de Rituerto, Luis Aranzabal bere entrenatzailearekin.