Akademiak atzo egin zuen urteroko ekitaldia Donostiako Luis Villasante Euskararen Ikergunean. Pasa den urtean hildako euskaltzainak omendu zituen, zazpi guztira; Amezketako Pello Zabala, Albizturko Eustasio Etxezarreta, Pello Apezetxea, Iñaki Segurola, Miren Jone Azurza, Pedro Sancristoval eta Txomin Peillen. Banan-banan irakurri zituzten iaz hildako zazpi euskaltzainen profilak.
Pello Zabala idazle eta ohorezko euskaltzain gipuzkoarraren hilberri-txostena Paulo Agirrebaltzategi ohorezko euskaltzainak irakurri zuen. Pello Zabala oso ezaguna zen Euskal Herri osoan. Musikazalea, irrati esataria eta meteorologoa, gizon apal bezain adeitsua izan zen. Euskararen eta euskal kulturaren mesedetan eginiko lanak kontuan izanik, Euskaltzaindiak ohorezko euskaltzain izendatu zuen fraide frantziskotarra 2018an.
1938. urtean Albizturren jaiotako Eustasio Etxezarreta euskaltzain urgazle gipuzkoarraren hilberri-txostena Lontzo Zugazaga ohorezko euskaltzainak irakurri zuen. Haurtzaroko ikasketak Andoainen egin zituen Etxezarretak, eta apaiz-ikasketak Donostiako seminarioan. 1963an, Donostiako elizbarrutiko apaiz egin zen. 1966-70 bitartean, Teologian eta Liturgian lizentziatu zen Erromako San Anselmo Institutuan. Donostiako elizbarrutian Liturgia Idazkaritzako arduradun eta Liturgiako liburuen euskarazko itzulpenaren eta argitalpenaren elizbarruti arteko talde-arduraduna izan zen 1970etik. EiTBko Meza Santua emankizunaren elizbarruti arteko arduraduna ere izan zen.1979an, euskaltzain urgazle izendatu zuen Euskaltzaindiak.