Alegian eta Amezketan herri antzerkiek eman zuten zeresana, urte amaieran. Herritar askok parte hartuz, guztiz arrakastatsuak izan ziren bi antzezlanak, bi herrietan. Alegiako Intxurre elkartearen 50. urteurrenaren aitzakian sortu zen herrian antzerkia egitearen ideia. Elkartearen urteurrenak bat egin du Inaxio Begiristain Albisuren jaiotzaren 100. urteurrenarekin, eta omenaldia egin nahian, Begiristainek idatzitako Bata zu eta bestea ni antzezlana taularatu zuten herritarrek, Intxurre antzerki taldea, Inaxio 100 urte izenpean. Herritarrengandik izan zuen erantzun onak, hiru aldiz egitera eraman zituen aktoreak. Eta Begiristainen jaioterrian, Altzon ere, egin behar izan zuten.
36ko gerrari lotutakoak, Amezketan
Antton Amundarain herritarrak egin du 36ko gerrako bilketa liburua idazteko, eta bere ideia izan zen herritarrek eta herritarrentzat antzezlana egitearena. Gidoia Agustin Amiano altzotarrak idatzi zuen, eta gerora egin zuten herritarren artean aktore lanak egingo zituztenen bilaketa. Gazte mordo bat animatu zen parte hartzera. Gerra omen zetorrek! Ederrak egin dizkinagu! antzezlana osatu, eta herritarrengandik izan zuen arrakasta ikusita, bost aldiz egin behar izan zuten egun bakarrean. Amezketako herritar askok egin zituzten aktore lanak, eta herritarrak gozaraziz, beraiek ere gozatu zutela aitortu zuten. «Oso-oso gustura» geratu ziren guztiak. Bost ataletan banatutako antzezlana prestatu zuten, gune ezberdinetan banatuta.