Eskualdeko urtezaharreko kros beteranoena Villabonako Zunbeltz eta Zizurkilgo Urkamendi elkarteek antolatzen dutena da, aurtengoan XXXVII. edizioa izan baita. Helmuga herri batetik bestera aldatzen da urtez urte, eta aurtengoan Villabonan izan da, Txermingo ikastolaren parean. Parte hartzea da helburua, eta herritar ugari animatu da urtea korrika amaitzera.
15:30ean haurren probak hasi dira, eta 16:30ean gazte eta helduen txanda izan da. Batzuek azkar bukatu dituzte egin beharreko itzuliak, eta beste batzuek patxadaz bukatu dute lasterketa. Guztiek, ordea, bi herriak lotzen dituen ibilbidean bota dituzte urteko azken izerdi tantoak.