Binakako Pilota Txapelketaren bosgarren jardunaldia amaitu da eskualdeko pilotarientzat, eta lehen mailakoan Altuna III.ak eta Tolosak bakarrik irabazi dute. Hain justu, eskualdeko beste pilotari baten aurka zuten partida, Peña II.a, eta bere bikote Mariezkurrena II.a. Altunak eta Tolosak 22-15 irabazi dute eta beraien hirugarren puntua eskuratu dute. Peñak hiru ditu ere irabazita.
Jakak eta Arangurenek 22-18 galdu zuten Ezkurdia eta Martijarena aurka, eta oraindik bakarra dute irabazita. Jakak minduta bukatu zuen partida, baina espero du asteburuan jokatzeko moduan izatea.
Iztueta, aurrelaririk gabe
Promozio mailako txapelketan gauza bitxia gertatu zaio Martxel Iztueta atzelari tolosarrari. Bere aurrelari titularra Agirre da, eta txapelketaren hasieratik lesionatuta dago. Bere ordez Alberdi ari zen jokatzen, baina jardunaldi honetan ez zegoen jokatzeko, eta ezta Baikoko beste aurrelariak ere, lesionatuta daudelako. Tartean Iñaki Artola alegiarra. Hori dela eta, Iztuetak gaur Beotibar pilotalekuan Salaberria eta O. Etxeberriaren aurka jokatzekoa zuen partida galdutzat eman diote, 22-0ko markagailuarekin. Oraingoz, beraz, bi partida irabazita ditu Iztuetak.
Iker Elizegi atzelari asteasuarrak beste garaipen bat lortu du Zubizarreta III.arekin batera. Egiguren V.a eta Erostarberi 22-17 irabazi zioten asteburuan. Bi puntu ditu orain Elizegik.