Eskualdeko bertsozaleentzat ezinbesteko hitzordua da Ataria Bertso Jaialdia, urtero jendez betetzen baita Leidor antzokia. 2023ko bertso-festak badu data eta kartela: urtarrilaren 21ean ospatuko da eta honako seikotea izango da oholtzan: Oihana Iguaran, Jexux Mari Irazu, Alaia Martin, Amets Arzallus, Nerea Ibarzabal eta Sustrai Colina. Gai-jartzaile lanetan, berriz, Amaia Agirre ariko da.
Sarreren salmentaren informazio guztia datorren aste hasieran emango da. Atarikideek, eta Galtzaundikideek, lehentasuna izango dute horiek eskuratzerako orduan. Bakoitzak gehienez bi sarrera eskuratu ahal izango ditu, bakoitza 15 euroren truke; gainontzekoak 17 euroan izango dira. Atarikide ez direnentzat, berriz, aurrerago jarriko dira salgai, aurtengoan online bidez.
