Binakako Pilota Txapelketaren laugarren jardunaldiari hasiera eman zioten Jaka-Aranguren eta Altuna III-Tolosa bikoteek, Santa Luzia egunean, eta Baiko enpresakoak eraman zuen garaipena. Honenbestez, Jakak eta Arangurenek bere lehen puntua eskuratu dute sailkapenean, eta Altuna III-Tolosa bi garaipenekin geratzen dira.
Atzoko jaialdian Artolak jokatu zuen, promozio mailako txapelketan Bakaikoa ordezkatuz. Alegiarrak Morgaetxeberriarekin batera jokatu zuen eta 22-9 irabazi zioten Egiguren V-Erostarbe bikoari.
Txapelketako partida Beotibarren
Igande honetan Bizkaia Frontoian jokatzekoa zen pilota jaialdia hurrengo egunean, abenduaren 19an, astelehenean, jokatuko da Tolosako Beotibarren, instalazioarekin zerikusia duten arrazoi teknikoengatik, Baiko Pilotak azaldu duenez.
Laso-Imaz, bi garaipenekin, eta P.Etxeberria-Rezusta, lehenengo puntua eskuratzeko asmoarekin kantxaratuko dira Beotibarren Binakako Txapelketako laugarren jardunaldiari amaiera emanez. Artola-Uriondo eta Irribarria-Salaverri II partidak emango dio hasiera jaialdiari astelehenean 16:30etik aurrera.