Bizkaiko, Nafarroako eta Gipuzkoako 27 harakinek parte hartu zuten. Ohi baino beranduago eman zuten txapelketaren irabazleen berri; izan ere, bigarren postuan berdinketa izan zen, eta atzeratu egin zen sari banaketa. Lehen saria Tolosako Arozena harategiarentzat izan zen, bigarrena Donostiako Arteaga harategiarentzat, eta hirugarrena, Ibarrako Joxe Mari Barriola harategiarentzat.
Mikel Odriozola Azpeitiko Udaleko Festa zinegotziak, Ainhoa Maiztegi Gipuzkoako Harakinak elkarteko kideak eta Ederto harakin elkarteko Maria Luisa Odriozolak banatu zituzten sariak. Aurtengo txapelketaren epaimahaia honakoek osatu zuten: Arantxa Arregi, Beatriz Larrañaga, Jesus Mari Deba, Mikel Uria eta Ederto elkarteko ordezkaria.
Txorizo egosi txapelketaren irabazleak txapela eta Mikel Sanjuan tailugileak egindako garaikurra jaso zituen. Bigarren eta hirugarren sailkatuek, berriz, Azpeitiko Udalaren garaikurra jaso zuten. Txapelketan parte hartu zuten harakinek diploma bana ere eskuratu zuten, eta horien guztien artean asteburu pasa ere zozkatu zuten. Horrez gainera, txapelketan lehen hiru postuetan sailkatu ziren harakinei datorren urtean Azpeitiko plazan txorizoa saltzeko postua jartzeko aukera eskaini zieten.
