Tolosak herri askorekin egiten du muga: Hernialde, Alkiza, Albiztur, Legorreta, Ikaztegieta, Alegia, Altzo, Amezketa, Azkarate (Araitz, Nafarroa), Lizartza, Orexa, Gaztelu, Belauntza, Eldua, Ibarra, Amasa-Villabona, Irura eta Anoeta. Enirio-Aralar mankomunitatearekin ere muga egiten du puntu batean. Hori dela eta, azaroaren 20rako, irteera antolatu du Alpino Uzturre Mendi Elkarteak.
Pasaban lantegitik (220 metro) abiatuta, Errondosoro baserritik pasatuz, Urkizura eta handik Herniozabal tontorrera (1.011 metro) igoko dira, eta gero, Udeta iturritik pasatuz Malaka baserrira jaitsiko dira. Ondoren, Lizarbakarra erreka jarraituz (PR Gi 114), Hernialdeko Bentan bukatuko dute. Tolosak Hernialde, Alkiza eta Albizturrekin dituen mugetatik pasako dira. 17 kilometroko ibilbidea da, 1.254 metroko desnibel positiboarekin, eta 6 ordutan egitea aurreikusten dute.
Informazio gehiago izateko eta izena emateko hiru aukera daude: Alpinouzturre.eus webgunean, info@alpinouzturre.eus helbide elektronikora mezua bidaliz edota 943 652 789 telefonora deituz.
Irteeraren bideoa: