Jon Maia bertsolariaren Kantu bat gara ikuskizunak Tolosan egingo du geldialdia azaroaren 11n. Leidor aretoan izango da emanaldia, 19:00etan, eta Jon Maia ez da bakarrik arituko, berarekin batera izango dira eszenatoki gainean, Gorka Hermosa akordeoilaria, Pello Ramirez biolontxeloan edo eta Natxo Soto teklatuetan. Emanaldia Galtzaundi Euskara Taldearekin elkarlanean antolatu du ATARIA-k.
Emanaldirako sarrerak presentzialki soilik eskuratu ahalko dira, Galtzaundi Euskara Taldearen egoitzan. Goizez (10:00-13:00) nahiz arratsaldez (16:00-18:00) erosi daitezke. Emanaldiko sarrerek 15 euroko prezioa dute, eta Galtzaundikideek eta Atarikideek deskontua izango dute; 13 eurotan eskuratu ahalko dute sarrera.
Izan ere, 30 urte dira Jon Maia bertsolariak bere aurreneko kantak idatzi zituenetik, Negu Gorriak taldearen Gure jarrera diskorako. Ordutik Euskal Herriko hainbat eta hainbat talde eta abeslarirentzat idatzi ditu kantuen hitzak: Negu gorriak, Gari, Mikel Urdangarin, Anari, Benito Lertxundi, Soziedad Alkoholika, Pirritx, Porrotx eta Marimotots, Gozategi, Ken Zazpi… Horietako kantu asko eta asko jendearen gogoan gelditu dira dagoeneko: Itsasoari begira, Gora Herria, Lehenbiziko bala, Nirekin, Non geratzen den denbora, Eskuetan, Itsasoa gara, Zaharra zara Bilbo eta abar…
