Aiztondoko eskola publikoaren sareak ekin dio ikasturte berriari. Aurtengo ikasturtean eskola berri bat gehitu zaie, lehendik Pello Errota ikastetxearen gela atxikitua zena eta orain eskola izenarekin estreinatu dena: Larraulgo herri eskola.
Aiztondoko eskola publikoaren sarea zortzi ikastetxe publikok osatzen dute: Fleming herri eskola (Villabona), Erniobea institutua (Villabona), Adunako herri eskola (Aduna), Pedro Maria Otaño herri eskola (Zizurkilgo Elbarrena), San Millan herri eskola (Zizurkilgo Herrigunea), Alkizako herri eskola (Alkiza), Pello Errota herri eskola (Asteasu) eta Larraulgo herri eskola (Larraul).
Bertako zortzi zuzendariak eta Lasarteko Berritzeguneko zuzendaria hilean behin biltzen dira koordinazio bilerak egiteko. Bilera horien helburu nagusiak dira Aiztondoko eskola publikoaren sarea indartzea, gai komunen inguruan elkarlanean aritzea eta eskolen arteko harremana sendotzea.